20190826 O Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (AMTEGA) desenvolveron en Boiro un taller sobre robótica construtiva e colaborativa para a mocidade. A cita, celebrada ao abeiro do programa de divulgación TechKids, impulsado polas ditas entidades, foi o 19 de agosto, na aula CeMIT local, en horario de mañá, e nela participou unha ducia de nenas e nenos de idades comprendidas entre os 9 e os 16 anos.
Segundo informaron os organizadores, a actividade iniciou ás nenas e nenos de 9 a 16 anos na programación dun xeito entretido, botando man de recursos concretos e ilustrativos como por exemplo un Mbot, un robot comercial que dispón das ferramentas precisas para introducir ás nenas e nenos nos segredos e nas potencialidades da robótica, dunha maneira lúdica.
A actividade consistiu en superar mini-retos, cada un dos cales, unha vez resoltos, instruíu ás alumnas e alumnos nun algoritmo distinto de programación. Os participantes, amais, experimentaron coa programación por bloques, aprendendo o ciclo da vida do software, os condicionais, as variábeis e os algoritmos.
Por outra banda, os participaron tiveron ocasión de interactuar cun MBot radiocontrol, construíndo colectivamente un mando a distancia para controlalo coma se fose un coche de radiocontrol.