20190826 Tralo descanso merecido destes días, A Pousada da Galiza Imaxinaria volve en setembro con enerxías renovadas, as mesmas que acumularon os seareiros locais da boa música (a música que escoitaremos, tamén, o día de mañá). O sete de setembro A Pousada reabre portas ás 21.00 horas cunha tripla fórmula de éxito.
A devandita fórmula de tres ingredientes vén da man da banda de punk-pop Lisdexia dende Muros (que presentaron o ano pasado o seu primeiro disco, Chejar e encher, e que está formada por cinco amigos da dita vila con formación conxunta e compartida na Escola de Música Municipal de Muros e no Conservatorio de Música Felipe Paz Carvajal), Break Out (grupo de trapcore que mestura o estilo hardcore co trap e que está a presentar detalles e temas da súa primeira maqueta oficial) e Archivo Adxunto (outra banda de Muros de punk-rock, formada polos músicos locais Javier Fernández Lariño, Yeray Santana Lestón e Adrián Bouzas Caamaño, que presentan esta tempada un disco que marca as diferenzas até no seu título: Libertad de opresión).
O prezo do concerto é de 6 euros, e está previsto o inicio das actuacións sobre as 22.00 horas da noite.
