20190812. Con motivo da reposición do cruceiro da praza de Galicia, o Concello da Pobra do Caramiñal organiza para o mércores 14 unha xornada de posta en valor do patrimonio. Deste xeito, celebrarase un acto festivo e outro divulgativo. O primeiro deles terá lugar de 20.00 a 21.00 horas, coa agrupación Caramiñas e Caraveiros que partirán da alameda percorrendo os emprazamentos peonís ata a praza onde se atopa o cruceiro. Neste lugar, praza de Galicia, haberá música e bailes tradicionais, así como breves intervencións da Alcaldía e da Concellería de Cultura. Mentres tanto, a segunda parte será de 21.00 a 22.00 horas no Auditorio do Museo Valle-Inclán, coa conferencia Un cruceiro entre vilas – Praza de Galicia que contará con dúas intervencións de sino complementario: Os avatares da historia, a cargo de Antonio González Millán, director do Museo Valle-Inclán; e O proceso recuperador por Juan Cabeza Quiles, mestre en escultura artística en pedra. Ademais, a sesión irá ilustrada pola proxección de fotografías de Abelardo Soler Torrente sobre o proceso de recuperación deste ben cultural e simbólico. Así o deron a coñecer o alcalde pobrense, Xosé Lois Piñeiro, e o director do Museo Valle-Inclán e funcionario que no seu momento fixo o proxecto de recuperación, Antonio González Millán.
González Millán sinalou que este cruceiro levaba máis de 150 anos perdido, polo que se levou a cabo un proxecto que levaba tempo preparado, encargándose a corporación actual de recuperalo. Así, ano e medio atrás fixéronse previsións orzamentarias para poder materializalo. A iniciativa xurdiu porque “había datos históricos desde o século XVI que na praza do Cruceiro, como se chamaba antigamente, actual praza de Galicia, existía un ben deste tipo.” Dita peza acabou perdéndose en 1878 e foi posible recuperar os distintos fragmentos grazas á colaboración da veciñanza e ao traballo do escultor Juan Cabeza Quiles. Tamén manifestou a importancia deste monumento pois separaba Deán do Caramiñal e “delimitaba dúas parroquias: Santiago do Deán e Santa María A Antiga.”
Pola súa parte, o rexedor expresou que con esta acción pretenden poñer en valor o patrimonio, co cal seguirán traballando neste eido. Así mesmo, apuntou que “é un valor tremendo cultural e para a nosa propia xente, sempre está o valor como recurso turístico, pero eu creo que neste caso ten unha tremenda importancia pola súa historia tan interesante do que significaba para os veciños e veciñas.”
