20190821. A Garda Civil de Boiro, en colaboración coa Policía Local deste municipio, detivo a un individuo como presunto autor dun delito contra a saúde pública, outro de usurpación de estado civil e un terceiro contra a seguridade do tráfico.
Os feitos sucederon cando a Policía Local boirense detectou a un individuo durmindo no interior dun vehículo estacionado na praza da Terceira Idade, nas inmediacións do centro social.
A patrulla procedeu á identificación do ocupante e á inspección do vehículo, atopando no seu interior dous cans deitados nos asentos traseiros e no maleteiro restos de follas e plantas, posiblemente de marihuana.
Ante o descubrimento realizado, os efectivos actuantes solicitaron o apoio da Garda Civil, desprazando a Benemérita a unha patrulla da Unidade territorial e compoñentes da Área de Investigación da mesma ao lugar. A Policía Local informou aos integrantes da patrulla dos feitos acaecidos e facilitoulles o D.N.I. aportado polo detido para a súa identificación.
Tras verificar o documento aportado, a Garda Civil constatou que o mesmo non correspondía coa identidade da persoa que o portaba. A forza actuante procedeu ao palpado superficial do detido, atopando no interior da súa vestimenta dous envoltorios de plástico e un de aluminio, os cales albergaban unha sustancia branca en forma de roca, supostamente cocaína, que unha vez pesada indicou un total de 37’02 gramos.
A Garda Civil solicitou a colaboración de persoal de Protección Civil para a extracción con seguridade dos cánidos, co obxectivo de realizar a inspección completa do vehículo, descubrindo durante a mesma unha carteira con 403’20 euros, dúas pistolas de gas, 8 aneis de fantasía, unha navalla e un teléfono móbil.
A Benemérita procedeu á detención do individuo, como presunto autor dun delito contra a saúde pública, pola cantidade de droga que portaba, outro de usurpación de estado civil, por presentar un documento pertencente a outra persoa para a súa identificación e un terceiro contra a seguridade do tráfico, por acceder e estacionar o seu vehículo nunha zona de tránsito peonil exclusivamente.
A Garda Civil puxo ao detido, xunto coas actuacións realizadas, os obxectos atopados e o vehículo, a disposición do Xulgado de Instrución Número 2 de Ribeira.