20190821. A segunda edición da BTT de Posmarcos celebrarase na parroquia pobrense de San Isidro de Posmarcos o próximo domingo, 1 de setembro, a partir das 09.30 horas. Así o deron a coñecer esta mañá o alcalde da Pobra do Caramiñal, Xosé Lois Piñeiro; Ana Romero, en representación da área de Deportes; o director deportivo de Arousa Natureza e Ocio, Eduardo Iglesias; e a representante da comunidade de montes de San Isidro de Posmarcos, Magdalena Olveira.
Este evento deportivo está organizado por Arousa NeO, coa colaboración co Concello, e ofertará aos participantes un percorrido similar ao do pasado ano, permitindo “dar a coñecer a nosa paisaxe e os nosos valores paisaxísticos e turísticos”, sinalou o rexedor pobrense.
Eduardo Iglesias manifestou que é un percorrido totalmente ciclable posibilitando completar cun desnivel acumulado positivo os 40 quilómetros de distancia “sen botar pé a terra.” Ademais, indicou que agardan “que sexa unha proba rápida, que sexa dinámica, moi ciclable e, á súa vez, competitiva.” Deste xeito, percorreranse diversos enclaves da zona ata chegar ao cumio máis alto da serra do Barbanza, permitindo contemplar “a beleza paisaxística da bisbarra.”
Pola súa parte, Magdalena Olveira expresou o seu agradecemento a Arousa NeO porque este evento atrae visitantes á parroquia, polo que tamén pediu a colaboración dos veciños.
O ano pasado houbo ao redor de 100 participantes, agardando igualar ou superar esa cifra nesta ocasión. Os interesados poden anotarse a través da páxina web http://www.arousa.com/bikeseries2019/ e o prazo está aberto ata o próximo mércores.
Con esta primeira proba ábrese o circuíto Sportbike-Bike Series 2019, tendo as sucesivas citas na BTT de San Martiño, en Ribeira, o 15 de setembro e a final disputarase na Contrarreloxo de Portosín o 6 de outubro, da cal sairá o gañador e gañadora do circuíto.
