20190705 Finalmente xa sabemos o gañador da segunda edición do Premio de Literatura Infantil Carlos Mosteiro, convocado polo Concello de Pobra do Caramiñal co obxectivo de impulsar, difundir e reivindicar o importante traballo das autoras e autores da nosa terra para introducir á rapazada no sempre sorprendente e enriquecedor mundo dos libros. Segundo se fixo saber esta semana, o xurado reunido na Pobra (composto pola escritora Patricia Mallo, a vocal da Asociación Cultural Barbantia Pilar Sampedro e o director xeral da Editorial Galaxia Francisco Castro), decidiu por unanimidade declarar gañadora do certame a obra O enigma do baúl pechado de Xosé A. Neira Cruz.
O xurado salientou a “fermosura da linguaxe poética empregada polo autor”, malia tratarse a temática dunha cuestión dura e difícil como “son as dificultades que moitas veces teñen as persoas inmigrantes para se integrar entre nós, tanto dende o punto de vista social como cultural”. Asemade, Mallo, Sampedro e Castro enxalzaron o punto de vista adoptado para desenvolver a trama, unha óptica próxima “ao marabilloso que entronca perfectamente coa vella e fecunda tradición literaria que vén dende Cunqueiro ata os nosos días”. Amais, o xurado puxo de manifesto a capacidade da obra para sensibilizar ás novas xeracións na defensa da igualdade e a loita contra dos prexuízos.
O II Premio de Literatura Infantil Carlos Mosteiro, convocado polo Conello da Pobra do Caramiñal, a Editorial Galaxia e Barbantia, ten como finalidade honrar a figura do recentemente falecido Carlos Mosteiro, escritor fundamental da literatura infantil e xuvenil amais de ser un autor moi estreitamente ligado á nosa comarca. O premio consiste na publicación da obra por parte de Galaxia na súa colección Árbore e 1.500 euros para o gañador.
O galardoado
Xosé A. Neira Cruz (Santiago de Compostela, 1968) é xornalista, escritor e profesor na Universidade de Santiago de Compostela. Licenciado en Xornalismo e Filoloxía Italiana, é doutor en Ciencias da Comunicación e en Filoloxía Italiana. Autor de máis de 30 obras de creación literaria, recibiu, entre outros, o Premio Merlín (1988, 2000), o Barco de Vapor (1997, 1999), o Raíña Lupa (2002), o Premio Lazarillo (2004), o Fiz Verga Vilariño de Poesía (2007), o White Ravens (2005, 2009), o Premio ao mellor libro estranxeiro publicado no Brasil en 2008, e os premios Barriga Verde e Manuel María de teatro (2008, 2009, 2010). Os seus títulos máis recentes son O sono das sereas (2017, Premio Repsol) e As vidas de… Antonio Fraguas (2019).
