20190729. O ribeirense Centro Cultural Lustres Rivas albergou esta tarde o acto de clausura do obradoiro de emprego Tahume V que nos últimos nove meses se estivo a desenvolver como unha acción compartida entre Ribeira e Porto do Son, contando cunha achega da Consellería de Economía, Emprego e Industria de 316.000 euros.
O delegado territorial da Xunta de Galicia na Coruña, Ovidio Rodeiro, acudiu a este evento que contou coa presenza institucional representando ao Concello de Ribeira do seu alcalde Manuel Ruiz e do seu edil Ramón Doval, mentres que polo veciño municipio sonense acudiron os concelleiros María José Maneiro e Manel Deán.
En total foron 20 as persoas que desde novembro do 2018 estiveron a formarse ben en traballos de carpintería e moble ou ben en actividades auxiliares en conservación e mellora de montes, ao tempo que efectuaron traballos beneficiosos para a comunidade, como a fabricación de mobiliario en madeira ou a conservación de masa forestal.
Deste xeito, os traballos prácticos no Concello de Ribeira consistiron na mellora do mobiliario de madeira de 9 centros educativos do municipio; na mellora de equipamentos públicos na rúa Cordieiro e Porto de Currubedo; na instalación de pasarelas de madeira nas praias de O Castro e Corna; no mantemento do mobiliario urbano no paseo de Coroso, área de Fontán e zona recreativa de Olveira, nas prazas de Centenario, Pablo Neruda, Concello, parque de Abesadas, Río Azor, Touro e Ameixeda; e finalmente en actividades auxiliares de mellora do Parque Periurbano de San Roque e do Monte Couso.
Por outra banda, no Concello de Porto do Son colocáronse 8 peches de madeira para contedores de lixo en Miñortos, Portosín, Nebra, Noal, Bariña, Queiruga, Caamaño e San Pedro de Muro. Ademais, instalouse unha varanda no miradoiro da fervenza na parroquia de Ribasieira, unha pérgola e unha pasarela en Portosín; así como a mellora dos paseos marítimos dos núcleos urbanos de Porto do Son e Portosín.
Outras das actividades do obradoiro consistiron na mellora da masa arbórea e na creación doutras en zonas desarboladas nas parroquias de Noal, Baroña, Ribasieira e San Pedro de Muro.
Ovidio Rodeiro destacou que “estes obradoiros permiten aos participantes obter unha cualificación profesional que favorece a súa posterior inserción laboral. Esta formación impulsa tamén o emprendemento, xa que os beneficiarios reciben formación específica que lles permite iniciar os seus propios proxectos.”
Na súa intervención, o alcalde Manuel Ruiz adiantou que a relación que durante cinco anos consecutivos uniu a Ribeira e Porto do Son para levar a cabo os obradoiros Tahume interrómpese temporalmente, xa que desta vez o concello ribeirense solicitou á Xunta un obradoiro de emprego de cociña aproveitando que se está a adaptar o segundo andar do mercado para crear unha escola de hostalería e perfeccionar a formación neste sector.
