20190709. O voceiro do grupo socialista na corporación municipal de Ribeira, José Manuel Vilas Álvarez, visitou na tarde de onte o lugar de Martín a petición da súa veciñanza, preocupada polo mal estado que, ao seu xuízo, rexistran algunhas das estradas deste lugar, cun firme no que se aprecian roturas e disgregacións.
Logo de escoitar aos residentes deste núcleo, Vilas Álvarez acudiu esta mañá aos servizos técnicos do Concello para interesarse sobre este asunto, especialmente polo retraso da actuación de mellora alí programada e adxudicada, que inclúe a pavimentación e a instalación de saneamento e pluviais na zona en cuestión, cun investimento que ascende a 68.304’38 euros, a execución pola empresa Anspal S.L.
O concelleiro socialista foi informado de que esta obra vai comezar esta semana ou, a máis tardar, a próxima, co cal “quedará canalizada a resolución destas molestias.”
