TechKids introducirá á rapazada de Boiro nos segredos da robótica

15 Xullo 2019

20190715 O Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (AMTEGA) van converter os concellos da nosa terra, nestes meses de verán (xullo, agosto e setembro), nun gran obradoiro lúdico-formativo sobre as máis prometedoras e enriquecedoras tecnoloxías dixitais. Estamos a falar dunha nova chuvia de sesións TechKids: xornadas sobre robótica, pilotaxe de drons, creación de aplicacións móbiles e videoxogos e animación 3D, todas elas co nexo común de impulsar o interese pola ciencia e a tecnoloxía entre a mocidade galega. A xira, que se enmarca no Plan DigiTalent, da AMTEGA, chegará a Boiro o día 19 de agosto, en horario de 10.00 a 14.00 horas, na aula CeMIT local. Na vila barbanzá celebrarase a xeira divulgativa sobre robótica.

Serán un total de 40 xornadas nas aulas CeMIT en diversos concellos das catro provincias galegas: ademais de en Boiro, recalarán en Tomiño (hoxe), Burela (mañá), Brión, Ames, Fonsagrada, Xunqueira de Ambía, Carballedo, Oroso, Fisterra, Pontevedra, Sarreaus, Beariz, Bande, Ribadeo, Cuntis, Valga, Leiro, Boiro, O Barco de Valdeorras, Pontedeume, Betanzos, Barreiros, Santa Comba, Ortigueira, Guitiriz, Padrón, Arzúa, Moaña, Abegondo, San Sadurniño, O Porriño, Celanova, A Coruña e Cerdeda. Os mozos e mozas interesados en participar nestas xornadas deben inscribirse na aula CeMIT da súa localidade.

Programación e robótica

Entre as cousas concretas que vai achegar o programa para a rapazada, atópase o obradoiroRobótica para tod@, que chegará a Boiro o día 19 de agosto, como dixemos, e que salienta por mesturar algoritmos e linguaxes co funcionamento de distintos robots. “A actividade iniciará ás nenas e nenos de 9 a 16 anos na programación dun xeito entretido”, segundo informan o CPEIG e AMTEGA, explicando que na actividade empregarase un Mbot, un robot comercial que dispón das ferramentas precisas para mergullar ás nenas e nenos nos segredos e nas potencialidades da robótica, dunha maneira lúdica, “xa que presenta o resultados dun xeito diferente”.

A actividade consistirá en superar mini-retos, cada un dos cales, unha vez resoltos, instruirá ao alumno nun algoritmo distinto de programación. Os participantes iniciaranse na programación por bloques, aprendendo o ciclo da vida do software, os condicionais, as variábeis e os algoritmos. “Coñecerán tamén as partes do robot e a función que desenvolven, condutividade e circuítos eléctricos cando constrúan o control remoto do MBot, ademais de debuxar, recortar e pegar o control do robot”, engaden as entidades organizadoras.

Nestas xornadas de difusión tecnolóxica sobre robótica tamén se inclúe a actividade MBot Segueliñas, onde se fará que o robot siga a liña dun circuíto, co alumnado competindo para ver que cousas fan ir máis rápido a máquina. Deste xeito, “aprenderán o ciclo da vida do software e os condicionais”, sinalan o CPEIG e máis AMTEGA.

Amais, xogarase cun MBot radiocontrol, construído un mando a distancia para controlalo coma se fose un coche de radiocontrol. Aprenderán eventos, electricidade e comunicación sen fíos e, finalmente, achegaráselles a actividade MBot Labirinto, construíndo un pequeno labirinto para ser percorrido polo MBot e axudalo a atopar a saída.

Outros artigos

Accidente de tráfico con persoa ferida leve no Concello de Boiro

O parque provincial de Boiro acudiu este venres 9 de maio sobre as 17:00 h, a unha chamada que alertaba dun accidente cun vehículo envorcado na AG-11.  Unha vez no punto, os bombeiros provinciais comprobaron que só había un vehículo implicado e envorcado. O seu labor...

+

Publicidade

Revista en papel

Opinión

O Barbanza
Resumo de privacidade

Esta web utiliza cookies para que podamos ofrecerche a mellor experiencia de usuario posible. A información das cookies almacénase no teu navegador e realiza funcións tales como recoñecerche cando volves á nosa web ou axudar ao noso equipo para comprender que seccións da web atopas máis interesantes e útiles.