Suma Ribeira levará ao pleno a proposición relativa á dixitalización da información e expedientes

20190719. O grupo municipal de Suma Ribeira presentou proposición para o próximo pleno sobre ‘Dixitalización da información e expedientes do Concello’.

Segundo manifestaron, Suma Ribeira leva esta iniciativa en forma de proposición porque consideran que “facilitar a información en formato electrónico será un avance importante e necesario tanto no que se refire a transparencia como a participación.”

Tal e como sinalaron, é preciso solicitar cita para ter acceso a un expediente e un funcionario debe estar presente mentres se realiza a consulta, podendo requirir fotocopias que se deben pagar a un prezo, “ao noso entender, abusivo.”

Deste xeito, o acceso áxil a toda a información “á que todas temos dereito legal é unha ferramenta útil que entendemos que contribuirá a dinamizar o coñecemento e capacidade de análise da actividade municipal das persoas ás que presta os seus servizos o Concello.” Asemade, pensan que axudará a que tódolos habitantes do municipio ribeirense se poidan sentir máis protagonistas e coñecedores da súa actividade con maior igualdade de oportunidades entre todas as parroquias.