20190718. Hoxe comeza unha das citas máis esperadas de todo o verán e, incluso, de todo o ano. A Festa da Dorna arriba a Ribeira e recalará ata o 24 de xullo, festivo local, facendo tamén unha pequena parada o 9 de agosto co ‘Baile de Jala’.
Esta LXXI singradura trae unha ampla e variada programación que arranca nesta xornada, ás 16.59 horas, coa ruta en moto de Os ReventaPistóns anunciando o inicio da festa polas parroquias do municipio. O parque García Bayón acollerá, ás 18.31 horas, o evento onde se medirá a habilidade e destreza dos mellores barmans das fanequeiras con distintivo de ‘Profesional Dorneiro’. Algunhas das probas que deberán afrontar consiste en estonar patacas con cortadores de uñas, tradución do borracho ao castelán, montar a terraza cos ollos vendados e catar licor de toxo, entre outras.
Ás 21.15 horas comeza na Porta do Sol a primeira entrega do ‘Rock & Dorna’ con De Vacas en concerto. Os Pintos Joden Quintos, gañadores da ‘Copa da ReI da LXX Sinjladura’, comezarán, ás 22.35 horas, o percorrido desde a súa fanequeira, Ventos Vellos, paseando o ‘Facho Dorneiro’ polas rúas de Ribeira. A ‘Seremonia de Inisiasión’ terá lugar na Porta do Sol, ás 23.03 horas, así como o reparto da dorneiriña da actual singradura a tódalas peñas activas. Ademais, a ‘Macroqueimada Dorneira’ celebrarase no adro da igrexa ás 23.18 horas. Finalmente, continuará o ‘Rock & Dorna’, ás 23.39, co concerto de Sés.