20190703. O sábado 6 de xullo, ás 18.00 horas, terá lugar a celebración da XIV Bandeira Concello de A Pobra de Traiñeiras, terceira proba puntuable da Liga Galega de Traiñeiras A (LGT). Neste evento deportivo, as 11 mellores tripulacións da competición autonómica loitarán pola bandeira de gañador, puntos en xogo e premios económicos.
A proba disputarase en 6 longos, en vez dos tradicionais 4, facendo que o espectador presencie o paso dos equipos en maior número de veces e visualice máis ciabogas. O arranque da competición prevé igualdade total, sendo Ares o equipo favorito para ondear a bandeira de vencedor.
A pesar de non competir este ano na Liga Galega de Traiñeiras, o Club de Remo Puebla continúa apostando forte polo deporte de remo, na súa modalidade raíña, a traiñeira, e xunto co Concello da Pobra fan posible que os afeccionados poidan desfrutar desta proba, na que os equipos que compiten na mesma se repartirán 9.000 euros en premios.
A organización desta regata pon o foco de atención de todos os seareiros do remo en Galicia, especialmente nun momento no que, a pesar de non competir en traiñeira no presente verán, o Club de Remo Puebla está vivindo un dos seus mellores momentos históricos no que a actividades se refire. De feito, máis de 100 persoas forman parte deste equipo humano, desde alevíns ata a recente formación dun equipo de nais de remeiros.
Co obxectivo de financiar a celebración deste evento, o Concello pobrense aportará 10.000 euros.
