20190730. A proposta gañadora do Premio Fetén ó Mellor Espectáculo de Rúa 2019 recala este xoves, 1 de agosto, no Cantón da Leña pobrense, ás 20.30 horas. Trátase do espectáculo Ohlimpiadas de Cía. Sincronacidas, unha proposta fresca e divertida na que dúas limpadoras ven como a súa rutina é retransmitida coma se dunha competición olímpica se tratase. O día a día é narrado coma se estivesen no Tour de Francia ou nos mundiais de natación sincronizada para construír un mundo absurdo e disparatado.
O espectáculo conta coa voz en off de Julia Luna, comentarista habitual dos mundiais de natación e dos Xogos Olímpicos da TVE.
Estas situacións cobran vida grazas á combinación de técnicas coma a danza, os portes acrobáticos e todo regado cunha boa dose de humor que da soporte a esta cita para o deleite de tódolos públicos.
Se vai mal tempo, a actividade desenvolverase no teatro Elma.
