20190726. A parroquia ribeirense de Aguiño celebrará o domingo, 4 de agosto, unha das citas gastronómicas máis arraigadas no calendario estival da comarca: a vixésimo segunda edición da Festa do Percebe. Este evento coincide así co último día das Festas de Ribeira por mor das mareas e para garantir a cantidade do percebe, así como a súa calidade.
A idea da Confraría de Pescadores de Carreira-Aguiño é a de repartir preto dunha tonelada deste crustáceo, repetindo a cifra da pasada edición. O evento comezará, ás 12.00 horas, coa regata de traíñas II Bandeira Festa do Percebe de Aguiño no porto desta localidade. Despois, ás 12.30 horas, procederase á entrega de galardóns aos percebeiros de honra. Ás 12.45 horas terá lugar a apertura da exaltación deste marisco nunha carpa de 840 metros cadrados cheo de mesas para a súa degustación ata esgotar existencias.
A ración estará composta por 350 gramos de percebe, cachelo e pan en prato de cerámica de Buño a un prezo de 15 euros. Tamén se poderá comer empanada variada do lugar a 3 euros. Ademais, haberá refrescos varios e viños albariño e ribeiro a prezos populares. A música correrá a cargo dun grupo de gaiteiros que animará o ambiente.
