20190731. A Asociación de Amas de Casa de Ribeira presentou esta mañá por segundo ano consecutivo o curso de monitor de tempo libre. As encargadas de detallar as características desta acción formativa foron Puri Cores, presidenta da asociación; Juana Ermitas Crujeiras, primeira vicepresidenta; e Mari Pego, vogal.
O curso terá unha duración de cinco meses, de setembro deste ano a xaneiro de 2020. A formación levarase a cabo os sábados, en horario de 09.00 a 14.00 horas e de 16.00 a 21.00 horas. O prezo é de 280 euros para socios, 255 para persoas que se atopen no paro e 230 para estudantes. O número de prazas é limitado, concretamente 25, e pode anotarse calquera persoa maior de 18 anos, con posesión do título da ESO ou equivalente.
Ademais, o colectivo ribeirense conta coa colaboración da Escola de Tempo Libre Illas Atlánticas, a cal se encarga de planificar as prácticas para os alumnos. Unha vez rematada a formación, entregaráselles aos participantes un título oficial pola Xunta de Galicia.
O prazo de inscrición estará aberto o luns da próxima semana e prolongarase ata o 12 de setembro, podendo realizarse na sede situada en Ribeira, na rúa Monumento 5 Entreplanta, ou a través do teléfono 981874577, do whatsapp 619066684 ou do enderezo amasdecasaderiveira@gmail.com. Será necesario presentar unha copia do DNI, do certificado dos estudos requiridos ou dun documento que acredite a situación de paro. Toda esta documentación poderá achegarse persoalmente ao propio local ou a través do correo electrónico mencionado anteriormente.
Así mesmo, desde a asociación indicaron que se trata do único curso que se celebra desta categoría na zona. De feito, o anterior ano participou xente do concello de Ribeira e dos municipios limítrofes. Tamén destacaron que, na edición pasada, se cubriron tódalas prazas e quedaron persoas en reserva, así como que algunhas conseguiron traballo unha vez finalizada a formación.