20190712 Este martes 16 de xullo, temos teatro pirata (no sentido máis aventureiro e literario do termo) para os máis novos na Pobra do Caramiñal. Estamos a falar da obra Festa pirata na Illa Calavera, a cargo do grupo Teatro Calavera. Será no Cantón da Leña a partir das 20.30 horas.
Segundo nos conta o Concello, organizador da actividade a través da Concellería de Cultura (en colaboración coa Rede Cultural da Deputación da Coruña), Festa pirata na Illa Calavera é un espectáculo que conta como protagonistas a dúas célebres piratas (Mary Read e Anne Bonny), dúas amigas que terán que afrontar un dos grandes retos da súa atarefada carreira en altamar e de illa en illa: socorrer ao pirata Calavera, que naufragou nunha illa descoñecida, e que enviou para o seu rescate unha mensaxe nunha botella. Como recompensa, ofrece “o seu maior tesouro” a quen consiga traelo de volta.
A obra de Teatro Calavera terá un formato interactivo con respecto ao público: en palabras do grupo escénico, trátase dun “xogacontos”, ou sexa, un conto participativo no que se busca que as nenas e nenos participen e se expresen a través de xogos musicais e bailes, seguindo o fío condutor dunha historia.
