A Coordinadora para o Estudo dos Mamíferos Mariños (CEMMA) vén de advertir dun importante incremento no número de varamentos de cetáceos nas nosas praias, un preocupante índice que afecta non só á especie de mamíferos mariños que máis se deixa ver no litoral barbanzán, os arroaces, senón tamén a outros tipos de golfiños e baleas. En termos máis concretos, CEMMA sinala que o número de días transcorridos no que vai de 2019 coincidiu cun varamento: un por xornada. Esta cifra é a máis alta dos últimos anos.
Ademais, os casos de cetáceos que foron dar aos nosos areais multiplicáronse por catro respecto ao ano 2015.
Deste xeito, malia que a coordinadora recoñece que é no primeiro trimestre do ano cando se producen máis mortes e doenzas destes animais (cousa que vén condicionada polas borrascas e ventos do suroeste), os membros da plataforma foron quen de detectar que “ese ritmo tan alto non baixou na primavera, e tivemos uns meses de abril e xuño que superan moito ás medias da última década”.
A coordinadora achegou unha gráfica para acompañar o informe. Nela móstrase como ano tras ano foron incrementándose os varamentos, dende os menos de 50 en 2015, até os 180 en 2019. Un dos máis recentes (na imaxe) localizouse o pasado 9 de xuño nas praias de Corrubedo. Foi o golfiño número 3.000 que acaba en terra nun período de tres décadas.
