20190704 O grupo alimentario galego Gadis e a Fundación para o Estudo da Obesidade SEEDO veñen de entregar os premios da máis recente edición do seu programa de hábitos saudábeis Alimentes, que pon o foco na rapazada (promovendo a comida sa e o exercicio físico e facendo fronte común para frear o incremento da obesidade na nenez). A campaña pechouse cun sorteo de agasallos entre os máis de 8.000 alumnos de Educación Infantil e Primaria de Galicia e Castela e León que tomaron parte activa en Alimentes. En cada unha das 15 localidades nas que se puxo en marcha a actividade agasalláronse unha bici, unha tableta e un patinete. Na campaña participaron escolares de Ribeira e Pobra do Caramiñal.
Previamente, a rapazada recibiu formación teórica e práctica sobre “aspectos clave” no seu desenvolvemento persoal”. Nesta edición, que se levou a cabo entre os meses de xaneiro e xuño, os monitores especializados fixeron fincapé na vertente ambiental do programa, sensibilizando ás nenas e nenos sobre a importancia de contribuíren á preservación do planeta.
Alimentes levouse a cabo en 15 localidades: A Coruña, As Pontes, Ferrol, Lugo, Narón, Ourense, Palencia, Pobra do Caramiñal, Ponferrada, Pontedeume, Ribeira, Santiago de Compostela, Salamanca, Valladolid e Vigo.
