Este 25 de xullo abre as súas portas a Feira do Libro de Rianxo

20190723 A Feira do Libro de Galicia (Federación de Librarías de Galicia) vai facer este 25 de xullo unha máis que relevante recalada na súa xira pola nosa xeografía: fará unha significativa parada en Rianxo, coincidindo coa festividade do Día da Patria, e cunha fin de semana ateigada de actividades culturais e mariñeiras (tal e como avanzamos estes días, poñendo o foco na Festa Gastronómica dos Produtos do Mar de Rianxo).

A Feira do Libro, que ficará aberta na vila (na praza de Castelao, en horario de 10.00 a 14.00 e de 18.30 a 22.30) até o domingo 28, contará coa presenza de importantes editoriais, librarías, escritoras e escritores da nosa terra. Será a parada número doce dunha xira libreira que inclúe presentacións de libros, charlas coloquios, concertos e actividades infantís.

Entre as editoriais que xa nos deron a coñecer o seu plan de actividades atópase Galaxia, que presentará (con concerto incluído do autor) o libro-disco de Xoán Curiel no que homenaxea a Antón Fraguas e o seu legado, Canta, Miña Pedra, Canta. Será o domingo 28 ás 19.00 horas. Por outra banda, Galaxia tamén dará a coñecer o libro Fina, A Pirata, da escritora Helena Villar Janeiro, afincada en Rianxo, e da ilustradora Eulalia Agreso. Será o xoves 25 ás 21.00 horas.