20190716. Os municipios que conforman Arousa Norte teñen un forte arraigo co mundo mariño. Ou ben se gardan gratos recordos de tempos pasados, ou ben supón un medio de vida. Por iso, a xente do mar celebra hoxe a festividade da Virxe do Carme, agradecéndolle a súa protección e pedindo polo futuro. Destaca o caso da parroquia ribeirense de Aguiño, pois tamén é a súa patroa e coincide cos seus festexos do verán. A Misa e procesión marítima acompañada pola Banda de Música de Negreira terá lugar a partir das 11.30 horas, para despois acudir ao picoteo disposto no local parroquial.
No municipio de Boiro, transcorre a Festa do Carme en Cespón e a procesión en Cabo de Cruz, cadrando esta tamén cos festexos do lugar.
Por outra banda, Rianxo vén celebrando desde o venres 12 e ata hoxe as festas na honra a esta figura relixiosa, culminando coa Misa cantada pola Coral Abraira do CC Simon Varela de Asados.
Aínda que a hoxe é a xornada propia segundo apunta o calendario gregoriano, os festexos desenvolveranse ao longo de todo o xullo, e incluso nos meses sucesivos.