20190716 Este venres 19 o teatro para nenas e nenos volve tomar as rúas de Rianxo, a partir das 12.00 horas. Trátase do novo espectáculo da Tropa do Trapo: a innovadora (innovadora pola posta en escena, os formatos empregados e a vontade de quebrar estereotipos temáticos) obra 4 Monos. Será na sala Arcos Moldes do Auditorio.
Segundo fan saber os integrantes da Tropa e reflicte o Concello, o espectáculo é un cruzamento de linguaxes: mestura a narración oral, a música ao vivo e o teatro de obxectos para “falar de como nos relacionamos entre nós e co medio, para pensar, para rir, para cantar e para soñar con outro mundo posible”.
Ente os puntos máis revolucionarios e arriscados da proposta figura o uso das populares emoticonas que (xa a estas alturas) todas e todos empregamos nas nosas comunicacións cos demais a través das redes sociais ou dos servizos de mensaxes instantáneas nos noso móbiles, onde teñen demostrado un gran potencial (as emitoconas) para pacificar discusións e mellorar o entendemento. Porén, na obra da Tropa de Trapo daráselles a volta estes elementos de comunicación para que os monos, que non falan nin ven nin escoitan nin falan, pasen á acción e sexan quen de reflexionar e comprometerse co mundo e coas necesidades da xente.
O espectáculo, destinado a un público familiar e infantil, será de balde até completar capacidade. A proposta está organizada polo Concello de Rianxo coa colaboración do Fondo Galego de Cooperación e Solidariedade.
