Boiro estrea os cursos da Campaña de Vela da Deputación

20190703. Os 40 rapaces e rapazas dos concellos da zona do Barbanza que participan na Campaña de Vela 2019 da Deputación da Coruña comezaron esta semana os cursos en Boiro.

Dita actividade, impartida pola Federación Galega de Vela, está dirixida a mozos e mozas de entre 9 e 18 anos, e desenvólvese durante toda a semana. Así, os alumnos aprenden e practican a navegación en quendas de 10.00 a 14.00 horas e de 16.00 a 20.00 horas.

O curso inclúe clases teóricas para que a xuventude coñeza o manexo das velas e os distintos utensilios necesarios para a navegación, afiancen conceptos e resolvan dúbidas sobre os distintos exercicios a realizar. Baixo a supervisión dos monitores, os alumnos tamén poñen en práctica o aprendido navegando pola ría de Arousa. Así mesmo, realizan un obradoiro de elaboración de nós mariñeiros.

Os cursos da Campaña de Vela da Deputación realízanse durante os meses de verán en diferentes concellos da provincia, permitindo que un total de 240 nenos e nenas aprendan ou practiquen a navegación.