20190719. Hoxe tivo lugar a presentación da programación cultural que se desenvolverá ao longo do verán no municipio de Boiro. Alberto García, técnico de Cultura, manifestou que “é un concello moi vivo en canto a dinamización cultural, tanto por parte do Concello coma nos últimos anos por parte de sociedade civil.” Destacou que non só terán lugar actividades organizadas polo Concello, senón tamén festexos e eventos impulsados pola cidadanía, ademais de romarías tan importantes coma, por exemplo, a de San Ramón de Bealo, declarada Festa de interese turístico de Galicia.
Juan Pérez Ortega, membro da directiva da Banda Municipal de Música de Boiro, lembrou que mañá se celebrará a décimo cuarta edición do Festival de Bandas Concello de Boiro, ás 20.30 horas, na praza do centro social. Esta cita contará coa participación da Banda de Música de Cee, baixo a dirección de Fernando Fraga Traba, e da Banda Municipal de Música de Boiro, coa batuta a cargo de Martín Baleirón Frieiro. O esquema será semellante ao de outro anos pois “faremos unha pequena entrada, unha introdución en marcha das dúas bandas e logo comezará a Banda de Música de Cee co seu repertorio e posteriormente irá a banda anfitrioa.” Ambas dispoñen dun repertorio de 40 minutos.
Pola súa parte, a concelleira de Cultura, María Outeiral, indicou que “a actividade cultural en Boiro está crecendo”, tratando de darlle dinamismo ao concello a través destas citas coma, entre outras, a sesión de contacontos ‘O Paroleiro’ de Pablísimo que tivo lugar hoxe na Casa da Cultura, ás 12.00 horas; o novo circo ‘Out of blú’ de Francesca Martello o 26 de xullo, ás 12.00 horas, na rúa peonil; ou o teatro na rúa ‘Sonambulante’ con Antón Coucheiro o 2 de agosto, ás 12.00 horas, na rúa peonil. Así mesmo, subliñou que se celebrará o teatro ‘Dona Barriga Verde’ con Larraitz Urruzola o 8 de agosto, ás 20.00 horas, na praia de Barraña. Tamén agradeceu a colaboración de tódalas persoas que se implican nestas actividades, así como o traballo da xente que está detrás desta programación.
Finalmente, sinalaron a importancia da ludoteca da Asociación Boirense de Empresarios (ABE) e dos campamentos do Concello para axudar coa conciliación.
