20190712. Unhas 350 persoas, preto da metade nenos, participarán mañá, sábado 13, na V Carreira Nocturna Jealsa. No acto de presentación desta proba estiveron o alcalde de Boiro, José Ramón Romero; o concelleiro de Deportes, Marcos Fajardo; o técnico de deportes, Antón Gallardo; a directora de relacións institucionais de Jealsa, Marga Hermo; e o director deportivo de Barbantia Roda, José Navarro.
Este evento constará dun circuíto urbano semellante ao de edicións anteriores e cun percorrido de 8 quilómetros 200 metros na categoría absoluta. Os nenos de 4 a 6 anos recorrerán 100 metros, 500 para os de 7 a 9, 1.000 para os de 10 a 12 e 1.500 para os de 13 a 15.
José Navarro indicou que o punto de saída e chegada será a rúa Doutor Santos Mieites transcorrendo a carreira “pola peatonal, xiramos dirección Cabo de Cruz para coller o paseo marítimo, imos dirección Escarabote que é o único punto cun pouco de subida, vimos para Boiro outra vez polos colexios de Praia Xardín, metémonos pola parte de atrás do paseo novamente para subir directamente á peatonal e rematar en Santos Mieites.”
O alcalde manifestou que “é unha boa iniciativa para darlle dinamismo a este pobo” e expresou o seu agradecemento a Jealsa, así como ao resto de empresas colaboradoras coma, por exemplo, Tarrío & Suárez, Hispania, Cervecería Plaza, Confitería Fátima, Kir’s, Barbantia e Tres Catorce.
Pola súa parte, o concelleiro de Deportes sinalou que o municipio conta con preto de 50 actividades deportivas, existindo numerosas entidades que teñen moito dinamismo.
Representando a Jealsa, Marga Hermo, apuntou que esta carreira “é unha magnífica oportunidade para que todos, tanto os boirenses coma a xente que nestes días está compartindo con nós as súas vacacións, se animen e fagan algo diferente pola noite.” Tamén destacou que Jealsa aposta polo deporte infantil, sendo unha prioridade pois é “unha forma de promover vida san e promover valores coma o traballo en equipo e o esforzo.”
Así mesmo, o rexedor aproveitou para pedir paciencia aos boirenses pois algunhas rúas quedarán cortadas. O paseo marítimo permanecerá pechado de 23.00 a 00.00 horas. Ademais, a rúa Principal cortarase durante 4 minutos cando saian cada unha das distintas categorías.
A saída na categoría infantil terá lugar ás 21.00 horas e na categoría absoluta ás 23.00 horas, cuxa entrega de premios se celebrará a partir da medianoite.
