Ampliado o prazo ata o 30 de agosto para visitar a mostra sobre Oswaldo Guayasamín en Santiago

20190702. A Fundación Museo de Artes do Gravado de Ribeira e Afundación, a Obra Social de ABANCA, amplían ata o 30 de agosto o prazo de visitas do proxecto expositivo Oswaldo Guayasamín 1919-1999. Dúas series. Dous aniversarios que se está a expoñer na sede de Afundación na rúa do Vilar, 19 en Santiago de Compostela. Aínda que estaba prevista a clausura desta mostra no mes de xuño, decidiuse ampliar en dous meses o prazo debido ao éxito de visitas, máis de 3.000.

As visitas poden realizarse de luns a domingo en horario de 12.00 a 14.00 horas e de 17.00 a 21.00 horas. Ademais, a mostra do artista ecuatoriano estará presente nas sedes de Afundación en Lugo, de setembro de 2019 a xaneiro de 2020, e en Ferrol, de febreiro a abril de 2020.

Esta exposición foi presentada o pasado 10 de abril polo vicepresidente da Fundación Museo de Artes do Gravado á Estampa Dixital, Javier Expósito; a coordinadora adxunta da Área de Cultura de Afundación, Paloma Vela; e a Profesora Titular de Historia de América da Universidade de Santiago de Compostela, Pilar Cagiao, comisaria da exposición, quen ofreceu unha visita guiada inaugural na que tamén interveu o director xerente de Afundación, Pedro Otero; o secretario xeral de Políticas Culturais da Consellería de Cultura e Turismo da Xunta de Galicia, Anxo Lorenzo; o presidente e o vicepresidente da Fundación Museo de Artes do Gravado á Estampa Dixital, Manuel Ruiz e Javier Expósito.