20190715. A V Carreira pola Diversidade que organiza a Asociación AMBAR desenvolveuse na explanada de Coroso, pretendendo visualizar e poñer en valor a práctica deportiva das persoas con diversidade funcional, así como amosar o papel do deporte como ferramenta de inclusión social real.
Sabela Pensado e Juan Carlos Mosquera impuxéronse en sénior na categoría absoluta que, como novidade deste ano, formou parte do calendario oficial de carreiras da Federación Galega de Atletismo, e a proba estivo baixo o control técnico do Comité Galego de Xuíces.
En sub-23 venceron Séfora Santos e Jorge González, mentres que o ouro da modalidade zapatilla inclusiva foi para Montse Pouso e Alberto Fernández. Así mesmo, Álvaro Illobre e Alejandro Ferradás triunfaron en handbike, facendo o propio José Manuel de la Iglesia en cadeira de atletismo.
Na entrega de premios estiveron presentes o director xeral de Maiores e Persoas con Discapacidade, Ildelfonso de la Campa; o alcalde de Boiro, José Ramón Romero; as concelleiras ribeirenses Juana Brión e Ana Ruiz; e o presidente de COGAMI, Anxo Queiruga, entre outros.
