20190729 A Pobra do Caramiñal vén de obter un importante recoñecemento á súa riqueza paisaxística, arquitectónica, turística e cultural, un recoñecemento que vén co engadido extra de provir da xente de a pé: visitantes e residentes. Segundo puidemos saber os días pasados, A Pobra foi elixida a localidade máis bonita de Galicia polas lectoras e lectores de La Voz de Galicia, a través dunha enquisa na que se lles convidada a dar forma ao ranking de vilas máis destacadas turisticamente: aquelas nas que sempre resultan ser unha boa elección para pasar uns días de lecer e, tamén, para vivir.
Na enquisa participaron 19.000 persoas e o obxectivo era elixir colectivamente a localidade máis fermosa de entre dúas ducias de alternativas. Tralo proceso de votación saíu elixida A Pobra en primeiro lugar, con 3.000 votos, sendo determinantes para tal elección a súa importante riqueza patrimonial e cultural, a beleza e boa conservación do seu centro histórico (que abrangue boa parte do territorio urbano), a súa situación privilexiada á beira da ría de Arousa (por unha banda) e da serra de Barbanza (pola outra), a fermosura das súas praias e paraxes fluviais (as praias do Areal, en pleno centro da vila, Cabío, A Lomba, etc, ás que cómpre engadir as piscinas naturais do río Pedras) ou o feito de contar co que con toda probabilidade sexa o miradoiro galego que mellores e máis espectaculares vistas ofrece da nosa terra: o miradoiro da Curota.
A listaxe, logo da primeira posición ocupada pola Pobra, complétase con A Guarda, Allariz, Combarro, Pazos de Arenteiro e Muros.
