20190726. O primeiro pleno ordinario do mandato da Pobra do Caramiñal celebrouse o mércores. Entre os puntos a abordar, tratáronse tres mocións presentadas polo PP. A relativa ao establecemento do sentido único de circulación na estrada que une Escarabote e O Conchido contou co apoio unánime. Do mesmo xeito, saíu adiante a solicitude de que se tenten suprimir os ruídos e luces das atraccións para que os nenos con autismo poidan desfrutar das festas ao igual que o resto, facéndoas máis inclusivas. Respecto da iniciativa para que o Concello se adhira ao plan de limpeza de maleza da Xunta, o BNG votou en contra.
Outro dos asuntos que se levou foi a petición do BNG de dispoñer duns bancos na zona de O Lagar, ao cal accederon tódolos grupos. Os nacionalistas tamén presentaron unha moción para que os xubilados se encarguen de dar o pregón do Nazareno, recoñecendo así o seu labor de reclamación dunhas pensións dignas. Desde o Goberno propuxéronlle ao grupo que retirasen o punto da orde do día porque “consideramos que a decisión de quen debe ser pregoeiro ou pregoeira das festas non debe ser motivo de debate nin de confrontación no pleno e propoñemos tratalo na xunta de portavoces.” Algo que foi aceptado por tódolos grupos municipais. Ademais, a proposta do BNG relativa a instar á Xunta de Galicia para que revoque a autorización de instalar os contedores frigoríficos de túnidos no peirao comercial, contou co apoio de Nós Pobra e PSdeG-PSOE e o voto en contra do PP.
Así mesmo, informouse de que contarán cunha subvención da Asociación de Desenvolvemento Local Deloa do 68’3%, correspondéndose con 75.526 euros, para as obras da Casa da Mocidade.
Finalmente, Estefanía Ramos tomou posesión como concelleira por parte de Nós Pobra.
