20190703. Un total de trinta actividades integrarán a programación da Fiestra da Cultura que se desenvolverá ao longo deste verán, entre o 6 de xullo e o 13 de setembro. A concelleira de Cultura, María Sampedro, xunto cos técnicos Unai González e Sandra Sampedro, presentou esta mañá o calendario que incluirá concertos, actuacións cómicas, cine ao aire libre, contacontos, etcétera. Ribeira e as súas parroquias converteranse así nun escaparate cultural durante toda a tempada estival.
Algunhas das citas están organizadas directamente pola concellería de Cultura, en ocasións, coa colaboración da Deputación ou a Consellería de Cultura da Xunta. Outras están promovidas polo tecido asociativo a través de colectivos como Haveira, Alfaia, a parroquia de Santa Uxía ou a Real e Ilustre Cofradía da Dorna.
Unha pequena mostra das citas que se desenvolverán son o V Festival Ribeira: Acrobacias, baile e humor ‘Sue Moreno con 4.0’; o concerto de Sés; a exposición ‘Antoloxía Debuxada’ de Xoán Fernández, Antonio Pérez, Xerardo Crusat e Maralla; e, as Noites de Cine ‘O mago dubidoso’.