20190711 A Festa da Dorna de Ribeira e toda a súa extensamente ramificada comunidade de seareiras e seareiros veñen de comezar a conta atrás para o comezo oficial das celebracións: a conta atrás de verdade da boa. Así, a xeito de actividade preparatoria e de interese para o colectivo pro-dorneiro, este venres 12 habilitarase no adro da igrexa (porta do Sol) un posto de venda para distribuír as últimas unidades do suadoiro desta LXXI singradura da festa (un máximo de dúas por persoa). A cita será contra o serán deste venres: entre as 19.00 e as 20.00 faranse os trocos de talles oportunos e a partir das 20.00 comezaranse a vender os suadoiros.
As actividades preparatorias e de pre-adestramento non rematan aí. O sábado a partir das 14.00 horas está prevista unha gran paellada en colaboración con peixes e mariscos Bomar: un xantar solidario na rúa Alcalá Galiano. A recadación irá destinada ao fondo social que xestiona a Confraría da Dorna.
Pola tarde, sobre as 19.30 horas, celebrase a derradeira (a derradeira deste ano) asemblea de peñas dorneiras na carpa do estaleiro. Trataranse, entre outros temas, a cuestión dos últimos detalles do programa e o reparto de organización de actividades entre as peñas.
