COMunidade foi o título elixido polas usuarias da Asociación AMBAR para a súa actuación enmarcada no programa do Xuño da Cultura e as Artes de Ribeira. As seis participantes mesturaron diversas danzas rexionais e tribais ofrecendo así unha proposta que logrou rachar as barreiras desta sociedade na que o egoísmo individual tenta perdurar no tempo. Unha función que gozou de gran aceptación entre os espectadores.
Aínda que estaba previsto que a actividade se desenvolvese na rúa de Galicia, tivo que ser trasladada á sala de exposicións do Centro Cultural Lustres Rivas por mor do mal tempo consecuencia da cicloxénese explosiva que azoutou a comunidade galega durante a xornada de hoxe.
