20190628. Na pulpería A de Quin realizaron onte o sorteo entre as seis persoas que acertaron a porra de quen sairía elixido como alcalde en Boiro, así como do número de concelleiros que acadaría cada grupo político na corporación municipal.
A partir das 21.00 horas comezou a chegar xente ao establecemento hostaleiro entre os que atopaban clientes habituais, representantes dalgunhas das formacións, os finalistas de dito sorteo, curiosos e o alcalde de Boiro, José Ramón Romero. Os seis posibles gañadores eran Juan José Fajardo, Jesús María Piñeiro, Nuria Calo, Julio Pardela, Enrique Triñanes e Francisco González. Este último foi o agraciado despois de que o rexedor boirense exercera de man inocente sacando a súa papeleta da urna ao redor das 21.45 horas. O premio, valorado en 1.200 euros, consistía nunha caixa de polbo, un baúl de gambas, estancias en casas de turismo rural e xantares en diferentes restaurantes, entre outros. Francisco González manifestou que “non me esperaba que fora o gañador” e que todo irá destinado a Cáritas.
Quin Riveiro, propietario do establecemento que levou a cabo esta curiosa iniciativa, explicou que das 1.000 papeletas acertaron 28 persoas os edís, pero 21 puxeran como alcalde a Juan José Dieste e 1 a Manuel Velo. Deste xeito, foron seis persoas as que tiveron o bo ollo de acertar respecto das actas e mandatario. Ademais, Riveiro declarou que o que comezou sendo unha broma tivo unha gran repercusión, pois chegou ao coñecemento de medios de comunicación nacionais. Así mesmo, manifestou que esta idea foi concibida como un xeito de “acercar a política á xente, de sacarlle ferro ao asunto”, co cal se converteu tamén nunha iniciativa pedagóxica.
