20190621 Esta finde celébrase na comarca a edición 2019 dos 100 dos International Trekkers, a ultra-andaina de camiñantes máis longa (son 100 quilómetros), máis completa e probabelmente máis famosa de cantas se celebran en Galicia. Os motivos non son poucos, e máis tendo en conta que a ruta non discorre precisamente por unha chaira.
Este ano, para garantir a máxima participación, os organizadores apostaron por principiar en terreo doado, máis ou menos a primeira parte do trazado, para logo botarse directamente ao monte: a serra do Barbanza coas súas costas rompepernas. O resultado é unha gráfica co perfil de ruta que é un ir de menos a máis. Segundo puidemos comprobar na web da ultra-andaina, este sábado parten da liña de saída 276 ultra-corredoras e ultra-corredores.
A experiencia será finalmente un continuo discorrer montañeiro polos principais espazos naturais e paisaxísticos dos sete concellos: Ribeira, A Pobra, Boiro, Rianxo, Porto do Son, Lousame e Noia. A saída será o día 22 na praza de España de Ribeira e a chegada ao día seguinte, pola tarde, no pavillón deportivo de Coroso de Ribeira, logo de percorrer a costa comprendida entre Ribeira e Pobra, meterse un treito costa arriba (bordeando por detrás o monte da Meda) e baixar logo para Boiro, Ponte Beluso, Moimenta, Iroite e a serra do Barbanza até o monte de San Aberto, xa preto de Ribeira.
Os 100 dos International Trekkers, para quen non o saiba a estas alturas, é unha proba non competitiva de sendeirismo/ultratrail de 100 quilómetros a realizar nun máximo de 24 horas, organizada polo Club Deportivo International Trekkers Barbanza Sar e pertencente á Copa Galega de Andainas da Federación Galega de Montañismo.
