Os polígonos de Ribeira e Boiro recibirán axudas de 240.000 euros para o seu acondicionamento

Os polígonos industriais de Ribeira (Xarás) e Boiro (Espiñeira) van recibir arredor de 240.000 euros da Xunta para mellorar en equipamentos e infraestruturas. Así o comunicou o Goberno galego (a través da Consellería de Economía) a finais do pasado mes de maio, explicando que boa parte das contías irán destinadas a optimizar a rede viaria dos complexos empresariais. As axudas destinadas a Ribeira e Boiro forman parte dun paquete no que se inclúen outras 55 iniciativas programadas para este ano en toda a xeografía galega (51 concellos). O orzamento total dos investimentos é de 5,34 millóns de euros.
En concreto, a través deste programa, a Consellería de Economía, Emprego e Industria achegará 4,05 millóns de euros para a execución dun total de 57 actuacións que permitirán impulsar as infraestruturas dos polígonos.
Do total de proxectos aprobados, a maioría (38) terá como obxectivo mellorar as infraestruturas viarias dos polígonos, aínda que tamén se desenvolverán iniciativas para a instalación de sistemas de seguridade e vixilancia (6), para plantas de depuración de auga, xestión de residuos e colectores con vertidos á depuradora municipal (8) ou instalacións contraincendios e contra roubo de cable (5). Desenvolveranse en 51 concellos galegos, dos que 32 son Concellos Emprendedores, é dicir, aqueles municipios adheridos ao convenio entre Xunta e FEGAMP para impulsar a captación de novos investimentos empresariais (e que foron prioritarios á hora de recibir as axudas).
As actuacións que se van levar a cabo no polígono de Xarás terán un investimento total de 119.600 euros, sendo as axudas de 95.680,06 euros.
Polo que respecta a Espiñeira, serán dúas actuacións cun investimento total de arredor de 177.000 euros, sendo as axudas da Consellería de Economía de arredor de 143.000 euros. Tanto Boiro como Ribeira están recoñecidos como Concellos Emprendedores.