20190620. O CEIP Plurilingüe de Palmeira resultou ser un dos oito centros de Galicia en recibir os Premios a Proxectos de Formación Permanente do Profesorado 2018 outorgados pola Consellería de Educación, Universidade e Formación Profesional. Este galardón recoñece a calidade dos plans de formación deseñados polos propios colexios e institutos e desenvolvidos no curso 2017/2018.
Así, a directora do centro ribeirense, Noelia Rebollido, explicou que o proxecto abranguía varias liñas. A primeira baseouse na integración didáctica das TIC para que o alumnado, mediante o ordenador, poida traballar tódalas materias do nivel no que se atopen englobando as materias curriculares. Coa segunda, iniciaron a construción dun patio sensorial no centro para que os pequenos tivesen unha zona de ocio máis interactiva. A terceira centrouse en que o profesorado de infantil organizou un grupo de formación para preparar material adaptado ao nivel dos cativos baseado en contos. A cuarta liña fundamentouse na maquetación de vídeos, “na que o resultado final foi coma un telexornal falando en pasado un pouquiño de todo o que os rapaces viviron no cole durante todo o ano.”
A directora foi a encargada de recoller o premio na entrega celebrada onte.
