20190627. Coincidindo coa celebración do Día do Orgullo LGBT que se festexa o 28 de xuño, e cando se compren cinco décadas do inicio desta reivindicación, os nacionalistas de Ribeira demandan unha maior implicación por parte do Concello neste ámbito.
O concelleiro Luís Pérez Barral reclamou esta mañá do Concello “un compromiso efectivo, un compromiso material e concreto, a favor da diversidade sexual.” Ademais, puntualizou que “non son capaces nin de pendurar a bandeira do arco da vella e por iso o ano pasado o fixemos nós mesmos. Desde o BNG entendemos que Ribeira ten que desenvolver accións concretas e despregar recursos.”
Deste xeito, Pérez Barral propón a posta en marcha dun Programa municipal de información e atención ao colectivo LGBT que, entre outras cuestións, teña como prioridade despregar campañas de sensibilización fundamentalmente nos centros de ensino do municipio, pois “sería un erro dar por completamente normalizada a realidade diversa, de diversidade de tendencias e identidades sexuais, cando seguimos asistindo a casos de discriminación, a casos de acoso e mesmo medo a visibilizar a condición afectivo-sexual no eido laboral” e que a maneira máis propicia para enfrontar esta realidade é “actuar desde a sensibilización, a concienciación social e a visibilización dos diferentes modelos afectivos, sexuais e de familias.”
Respecto ao obxectivo desta medida, Barral explicou que se trata dun programa para dar apoio económico, técnico, ao traballo que desenvolve o tecido asociativo, polo cal “desde as institucións débense facer accións mais tamén apoiar aos colectivos para que tamén desenvolvan traballo para evitar todo tipo de discriminacións, un ámbito no que habería que actuar sería por exemplo o deportivo.”
Así, defenden que desde o ámbito municipal se supla “unha carencia existente resultado da década de recortes impostos polo Partido Popular desde a Xunta” e que Pérez Barral exemplificou na supresión dos Centro Quérote que prestaban servizos de orientación afectivo-sexual, considerando que “Ribeira é unha vila diversa e desde o goberno débense defender os dereitos sociais e iso pasa tamén por defender, no concreto, con actuacións afectivas, as liberdades sexuais.”
