20190627. A deputada e portavoz de pesca do BNG, Montse Prado, formulou unha pregunta ao goberno sobre o anuncio de Portos de Galicia para depositar os lodos procedentes da dragaxe do río Lérez nunha zona próxima á illa de Sálvora.
Na súa intervención, Prado lembrou que a finais dos anos 90 o Estado español fixou un lugar entre as illas de Sálvora e Ons para verter os lodos e residuos procedentes das obras de ampliación de peirao de Ferrazo, en Vilagarcía de Arousa, e que desde esa data foron toneladas de metros cúbicos os depositados no lugar que se converteu nunha “auténtica montaña cunha área similar a varios campos de fútbol e metros de altura.”
A deputada tamén explicou que o punto de vertido é un espazo protexido e forma parte do parque das Illas Atlánticas, Zona CEPA e área Ospar cuxo obxectivo é conservar os ecosistemas mariños, prevención e eliminación de contaminación.
Así mesmo, a nacionalista recalcou que “non podemos permitir” a existencia dun depósito con toneladas de residuos na bocana da ría de Arousa, poñendo en risco o ecosistema e riqueza ambiental da ría galega máis produtiva.
O BNG amósase contrario ao vertido e á permanencia do depósito na canle de entrada á ría “pola que entra a corrente oceanográfica que provoca o afloramento na ría de Arousa, e polo tanto, todo o que se deposita lévao a corrente e os temporais dispérsano ría dentro.” Ademais, acusou á Xunta de Galicia de “irresponsable” e de aplicar unha política contraria ao sector extractivo da ría arousá, “estratéxico, pola riqueza e emprego que xera: o 44% das mariscadores a pé, o 68% das bateas de mexillón e o 41% das embarcacións de artes menores”, así como unha frota pesqueira composta por máis de 1.700 embarcacións de pesca e máis de 800 auxiliares de pesca e acuicultura.