Os nacionalistas de Boiro fan público o seu apoio ao candidato do PSdeG-PSOE á alcaldía no pleno de investidura que se celebrará o sábado. Deste xeito, consideran que facilitan un cambio no goberno municipal e que compren coa palabra dada “tanto a nivel Local como Nacional, sobre o feito de que naqueles supostos nos que dependa do BNG non haberá nas vilas e cidades do noso País gobernos do Partido Popular.”
A decisión foille comunicada aos socialistas boirenses desde a primeira toma de contacto entre ambas organizacións políticas. Indican que se trata dun apoio transmitido “sen condicións, respectando deste modo a vontade maioritaria da cidadanía de Boiro, e con total xenerosidade, consciente da importancia que para o noso Concello ten a posibilidade de contribuír a outra forma de facer política.”
A postura da asemblea local do BNG de Boiro foi clara e unánime desde o mesmo momento en que se coñeceron os resultados electorais do pasado mes de maio, “e consecuente coa forma de entender a política por esta organización, así como co traballo desenvolvido nos últimos catro anos, evitando o mercantilismo político e sendo coherentes.”
Así mesmo, os nacionalistas manifestan que queren distanciarse “daqueles actores políticos do noso Concello que levan anos decidindo a súa acción política en virtude de contraprestacións en moitos casos de carácter persoal que contribúen a denigrar as institución e ás persoas que forman parte delas.” Finalmente, sinalan que o apoio comprometido á investidura do candidato socialista, José Ramón Romero, “non pode entenderse, de aquí en adiante, como un cheque en branco”, ocupando o lugar que lles corresponda na lexislatura que está por comezar e seguirán traballando “en beneficio da cidadanía, antepoñendo sempre os intereses desta, desde a coherencia cos nosos principios e coa única finalidade de lograr un Boiro e unha Galiza mellor.”
