O partido político encabezado por Xosé Lois Piñeiro, Nós Pobra, logrou ser a lista máis votada nos comicios municipais do pasado mes de maio, acadando 2.019 papeletas e 5 escanos. Estes datos tradúcense nunha melloría respecto ás eleccións do 2015, onde conseguiron 1.563 sufraxios e 4 edís. Uns resultados que a súa asemblea valora “moi positivamente” e considera que a formación “obtivo o respaldo maioritario da cidadanía e que temos a encomenda de tratar de acceder a alcaldía e formar goberno.”
Tamén sinalan que son “perfectamente conscientes” de que non contan coa maioría suficiente para asegurar a investidura do seu candidato como alcalde. Por esta razón, solicitaron manter reunións co BNG e co PSdeG-PSOE.
Ante a solicitude de que apoiasen a súa investidura, os nacionalistas responderon que os seus votos non eran necesarios, pois obterían a alcaldía por ser a forza máis votada. Así mesmo, Nós Pobra ofreceulle establecer un pacto de goberno, para o cal “evidentemente solicitamos a garantía de acceder á alcaldía co seu voto favorable. Quedamos agora á espera do que decida a súa asemblea e de como valore esta proposta.”
Respecto da primeira xuntanza mantida cos socialistas, a cal resultou “satisfactoria”, solicitaron o seu apoio na investidura e ofreceron a posibilidade de formar un goberno conxunto “baixo unhas condicións que, se ben se esbozaron alí, non quedaron aínda definidas.” Agora quedan á espera de que a asemblea socialista acepte a proposta de negociar un pacto de goberno.
Por todo isto, desde Nós Pobra non consideran asegurada a investidura de Xosé Lois Piñeiro como alcalde, así como a posibilidade de formar goberno, especialmente despois de que “o BNG anunciara publicamente a súa decisión de presentar candidatura e votar polo seu candidato.” Deste xeito, a falta de confirmación do voto do PSdeG-PSOE, apuntan que só existen dúas posibilidades: ou o PP vota polo seu candidato, dándolle a alcaldía a Nós Pobra por ser a lista máis votada; ou os populares votan polo BNG, outorgándolle o bastón de mando a Ramiro Ouviña.
A formación política manifesta que “a primeira opción é a máis acaída, a máis xusta e a que determinou co seu voto a cidadanía da Pobra. A segunda debería evitarse por parte das forzas da esquerda, optando pola abstención ou por non presentar candidatura.”