A parroquia ribeirense de Artes celebrará durante tres días as súas Festas do Verán. O día de hoxe, na honra de San Antonio, amenceu ao son de dianas e alboradas para, ás 12.00 horas, dar paso á Misa Solemne e procesión. Pola tarde, ás 17.00 horas, comezan os festexos para os rapaces e, pola noite, o grupo Arena e a disco móbil serán os encargados de poñer á xente a bailar.
Mañá día 15 e na honra da Virxe do Carme, a veciñanza espertará coas dianas e alboradas. Ás 12.00 horas oficiarase a Misa Solemne coa posterior procesión. A noite será amenizada pola orquestra Los Trobadores e disco móbil.
O domingo 16, na honra do Sagrado Corazón de Xesús, a Misa Solemne terá lugar ás 11.00 horas. As sardiñas e o churrasco repartiranse a partir das 13.00 horas coa música a cargo do grupo 3.com ás 14.30 horas.
Ademais, o domingo 30 será a Festividade de Corpus polo que, ás 13.15 horas, haberá Misa Solemne cantada pola Rondalla de Aguiño e, a continuación, a Banda de Música de Negreira acompañará a procesión coas tradicionais alfombras florais.
