20190623.- Fotógrafos afeccionados de todo o mundo inmortalizarán os ceos nocturnos das Illas Atlánticas a próxima fin de semana.
O obxectivo é que grazas a este concurso de carácter internacional, no que colabora o Parque Nacional, se dea a coñecer o espectáculo que supón a observación astronómica en espazos naturais libres de contaminación luminosa
O certame celebrarase simultaneamente en 29 destinos de España, Portugal, Chile e Canadá que gozan da certificación Starlight, distinción avaliada pola Unesco para recoñecer as calidades para a observación nocturna que teñen algúns enclaves.
Os participantes deberán presentar tres fotografías tomadas entre a posta de sol do sábado 29 de xuño e o amencer do día 30 de xuño e que teñan o ceo como protagonista. O certame cumpre este ano a súa cuarta edición.
De forma paralela ao concurso, a organización, co apoio e a colaboración do Parque Nacional das Illas Atlánticas de Galicia, ten previsto amais realizar unha serie de actividades lúdicas, de divulgación e formación abertas tanto aos fotógrafos afeccionados que pasen a fin de semana no arquipélago, como aos seus acompañantes ou calquera outra persoa que queira gozar das estrelas nestes paraxes únicos. Concretamente, este ano o programa centrarase tan só na illa de Ons, e constará dun curso de iniciación á Fotografía Nocturna de sete horas durante a tarde-noite do venres 28 e de varias charlas e actividades ao longo do sábado 29, de forma previa ao inicio do Maratón.
