A ponte que une os concellos de Rianxo e Catoira dende 1981, cruzando o Ulla e abeirando as Torres do Oeste, volve estar no punto de mira polas súas necesidades periódicas de acondicionamento e reparación. Para coñecelas de primeira man, as deputacións de Pontevedra (a través do Departamento de Mobilidade) e Coruña están a realizar esta semana inspeccións específicas sobre as posíbeis eivas estruturais da construción, con visitas a efectuar arranxos concretos en caso de que sexan precisos. Esta inspección obrigará a cortar hoxe (xoves 13) ao tráfico un dos carrís do viaduto, entre as 10 e as 12 da mañá aproximadamente.
Entre os traballos concretos a desenvolver, realizarase unha inspección visual exterior (empregando cámaras fotográficas con zoom, GoPro con pértega, prismáticos, etc.); un exame interior (para o que se empregará cámara fotográfica, martelo, fisurómetro, etc.) e unha inspección exterior mediante dron; ao que cómpre engadir unha nivelación do bordo da calzada.
Unha vez rematados os traballos de campo comezará o labor en gabinete para realizar unha avaliación da obra, que cotexará os datos obtidos a pé de ponte e incorporará as reparacións previas. “Con esta avaliación estrutural preténdese obter o nivel de seguridade do viaduto ante as solicitacións de carga actuais”, explicou a Deputación de Pontevedra, engadindo que cos resultados obtidos poderíase barallar a posibilidade de establecer limitacións no uso do viaduto e/ou abordar traballos de reparación da estrutura.
O labor de inspección ten un prazo de execución de cinco meses e un orzamento de 18.089,50 euros.
Un pouco de historia
A orixe da ponte está nos anos sesenta, cando as necesidades de comunicación dunha Galicia en pleno desenvolvemento e dun volume de tráfico interprovincial que non paraba de medrar derivaron no xermolo do proxecto. Finalmente, comezouse a construír na seguinte década, para ser inaugurado en 1981 logo dun investimento total de 1,2 millóns de euros. En 2004 a ponte de Catoira foi remodelada en profundidade, pero o proceso de deterioro seguiu avanzando anos despois, en boa medida pola antigüidade da infraestrutura de base e, tamén, polo volume importante de tráfico (moito del pesado) que soporta a diario (uns 10.000 vehículos). Entre os principais problemas actuais da ponte, como ben saben os condutores que a cruzan, figuran o afundimento do firme nalgúns treitos.