20190618. A conselleira de Infraestruturas e Mobilidade, Ethel Vázquez, destacou hoxe a inversión autonómica de 14 millóns de euros no saneamento e o sistema de depuración de Rianxo, a través das obras en execución do novo colector e tanque de tormentas e a ampliación da depuradora, cuxos traballos comezarán a finais desde mesmo mes, tal e como avanzou.
Vázquez Mourelle supervisou esta mañá as obras de execución do novo colector e tanque de tormentas acompañada do alcalde de Rianxo, Adolfo Muíños. Unha actuación que “se enmarcan na aposta que está facendo a Xunta para apoiar aos Concellos no desenvolvemento das súas competencias municipais de saneamento e depuración, e nas que se están invertendo 6’5 millóns de euros.”
Trátase da realización “dun novo colector interceptor de maior capacidade que o actual, duns 1.400 metros de lonxitude e dun tanque de tormentas soterrado” que permitirá regular o caudal que chega á depuradora almacenando, principalmente nos días de chuvia, as augas antes de ser bombeadas ata a depuradora, a través dun pozo de bombeo que se construirá contiguo ao tanque.
Segundo explicou, esta intervención “permitirá mellorar a calidade das augas e avanzar nesa importante tarefa de conseguir o saneamento integral da ría de Arousa, ao resolver os problemas actuais, derivados das elevadas infiltracións de auga na rede de saneamento do municipio, que fan que o actual colector chegue saturado ao núcleo urbano, provocando vertidos.”
Así mesmo, a conselleira anunciou que estas obras do novo colector e tanque de tormentas de Rianxo serán completadas coa ampliación da estación depuradora de augas residuais, tarefa que se iniciará a finais deste mes e á que se destina un presuposto de 7’5 millóns de euros.
A titular de Infraestruturas e Mobilidade destacou que “esta ampliación da depuradora permitirá adecuar a capacidade de tratamento ás necesidades reais e solucionar a problemática actual derivada do excesivo volume de augas residuais en rede e da súa carga contaminante.” Deste xeito, fixo fincapé en que ambas actuacións permitirán “mellorar o servizo de saneamento e depuración que se lle presta aos veciños de Rianxo e, ao mesmo tempo, conseguir unha xestión eficaz e eficiente da auga que incidirá na mellora da calidade das augas da ría e na recuperación de zonas costeiras, algo esencial para a pesca, o marisqueo e o turismo da zona.”
Finamente, indicou que estas dúas intervencións atópanse recollidas no Plan de saneamento local da ría de Arousa e que neste caso, dada a lonxitude da costa desta ría e a súa alta ocupación, abordouse o saneamento redactando 5 plans diferentes pero coordinados entre si, entre eles, o Plan de saneamento local de Boiro e Rianxo. Ademais, apuntou que “desde a Xunta séguense dando novos pasos para completar o plan de saneamento local da ría de Arousa, con estas dúas novas actuacións aquí en Rianxo.”