A Pobra celebra o Mes do Medio Ambiente con charlas e unha macro-feira ecolóxica

Este 5 de xuño celebrouse o Día do Medio Ambiente, unha data para que tomemos conciencia da importancia de coidar do planeta, con xestos miúdos, sinxelos e cotiáns ou ben participando en grandes e mediáticas accións colectivas (propiciadas principalmente polas redes e as novas comunidades). Collendo este espírito e amplificando a celebración do 5 de xuño, o Concello da Pobra sumouse ás actividades mundiais da dita xornada co Mes do Medioambiente. O programa inclúe unha manchea de actividades lúdicas, formativas e gratuítas para a rapazada e para os maiores. O obxectivo: mostrar a diversidade biolóxica do concello para favorecer o seu coñecemento universal e, tamén, a súa protección.

O programa de actividades, para as que é posíbel inscribirse na conta medioambiente@apobra.gal, comezou este 5 de xuño no auditorio do Museo Valle-Inclán, ás 20.30 horas, cunha charla sobre a píllara dunar (Un fráxil tesouro por conservar nas nosas praias) a cargo de María Vidal, doutora en Bioloxía e investigadora no Departamento de Zooloxía, Xenética e Antropoloxía Física da Universidade de Santiago de Compostela.

As charlas e obradoiros continuaron o xoves na Aula de Estudo local, cunha acción formativa aberta para mostrar o que facer en caso de atopar na praia un cetáceo varado (a cargo de Alfredo López, biólogo do CEMMA, a Coordinadora para o Estudo dos Mamíferos Mariños), e, novamente no Museo Valle-Inclán, cun achegamento ás tartarugas e mamíferos acuáticos na Ría de Arousa.

Os devanditos relatorios servirán de antesala ao miolo do programa: a Feira do Medio Ambiente que se celebra o venres 7 (de 17.00 a 21.00 horas), o sábado 8 (de 11.00 a 14.00 horas) e o domingo 9 (de 17.00 a 21.00 horas) nos Xardíns Valle-Inclán da Pobra. A cita contará coa presenza activa de entidades como as protectoras Moura e Arca, o CEIDA, a Estación de Hidrobioloxía do Encoro do Con, a entidade de reciclaxe Ecoembes ou a cooperativa galega Nosa Enerxía, entre outras. Nas casetas habilitadas nos céntricos xardíns da vila, as organizacións e asociacións mostrarán as súas actividades e proxectos.

A apertura oficial da Feira do Medio Ambiente levarase a cabo este venres 7 ás 17.00 horas. Máis tarde, ás 20.00 horas, celebrarase no Museo Valle-Inclán a presentación do libro Na Defensa dos Animais, de Óscar Horta, publicado por Axóuxere, o selo editorial de Rianxo.

Ao día seguinte, sábado, desenvolverase pola mañá, novamente nos xardíns, unha xincana ambiental para nenas e nenos de 6 a 12 anos. Nesta actividade, a rapazada realizará unha serie de probas de habilidade e enxeño con relación aos distintos ecosistemas que hai na Pobra: litoral (na praia dos Areos), marismas (paseo das Xunqueiras) e espazos verdes urbanos (xardíns Valle-Inclán). un agasallo.

Xa contra a última hora da tarde, ás 20.30 horas, o Museo Valle-Inclán acollerá o coloquio Causas, efectos e solucións da contaminación lumínica, da man de Marco Antonio Vilar Sanlés, socio activo dende 2009 da Asociación Astronómica Sirio. Unha vez rematada a charla levarase a cabo unha saída colectiva en autobús até o monte de A Curota para observar os ceos nocturnos da comarca do Barbanza, na compaña de especialistas en astronomía e contando con equipamento específico (telescopios e demais aparellos). Esta saída está aberta ó público en xeral, tanto nenas e nenos como adultos. Durará aproximadamente dúas horas. A encargada de mostrar as marabillas do ceo será a empresa Mundo Estrellado.

Logo da celebración da Feira do Medio Ambiente, o auditorio do Museo Valle-Inclán da Pobra acollerá o mércores 12 un coloquio a cargo de Alberto Ruano Raviña, profesor titular de Medicina Preventiva e Saúde Pública da Universidade de Santiago de Compostela. O coloquio desenvolverase baixo o seguinte epígrafe: O radon e os seus efectos sobre a saúde. Medición e mapa de radon da Galiza.

O mércores 19, no mesmo emprazamento, está prevista outra charla, desta volta a cargo Rufino Vieira Lanero, doutor en Bioloxía e actual xefe da Estación de Hidrobioloxía Encoro do Con. Falará, a partir das 20.30 horas, da biodiversidade das augas continentais.

Por último, o mércores 26 de xuño, Ramsés Pérez Rodríguez, licenciado en Ciencias da Educación, educador ambiental e membro da asociación ecoloxista ADEGA, afondará na problemática das especies exóticas invasoras, a partir das 20.30 horas no Museo Valle-Inclán.