20190626 As Feiras do Libro de Galicia (Federación de Librarías de Galicia) seguen o seu itinerario pola nosa terra, un percorrido descentralizador que complementa as recaladas nas grandes cidades coas estadías en localidades de menor tamaño pero que tanto en inverno como en verán atesouran importantes comunidades de seareiras e seareiros da lectura (e de todas as cousas que acompañan a publicación literaria). No que se refire a Barbanza, logo da visita a Ribeira está programada unha recalada de catro xornadas (entre o 25 e o 28 de xullo) en Rianxo.
Será a parada número doce dunha xira libreira que inclúe presentacións de libros, charlas coloquios, concertos e actividades infantís.
Logo da cita cambadesa (estes días pasados), a feira chegará mañá a Vigo, onde estará entre o 27 de xuño e 6 de xullo. As vindeiras citas serán nos municipios de Ponteareas, do 11 ao 14 de xullo; e máis no de Rianxo, entre o 25 e o 28 de xullo. Pecharase a edición do 2019, xa no mes de agosto, na Coruña, desde o 1 ata o día 11; en Viveiro, do día 14 ao 18; en Foz, entre o 22 e o 25; e, finalmente, en Monforte de Lemos, do día 28 ao 31.
