Axóuxere, editorial e comunidade rianxeira de lectores e escritores, vén de lanzar oficialmente a edición 2019 da súa residencia-factoría de creación literaria. O obxectivo desta nova convocatoria: brindar un lugar para o pensamento e o pulo literario, “un lugar libre á marxe da panamétrica da sociedade do consumo e o espectáculo”. Como recordaremos, a residencia de escritores de Axóuxere atópase na localidade de Brión (parroquia de Leiro), en pleno ambiente rural-costeiro de Rianxo (moi preto das inspiradoras praias das Cunchas e Porrón), onde se brindan estadías a autoras e autores de todo o mundo para xerar novos proxectos ou dar forma a obras xermoladas previamente.
As residencias deste ano, co-organizadas coa Deputación da Coruña e o Concello de Rianxo, desenvolveranse en dúas tempadas: verán (nos meses de agosto e setembro) e outono (entre os meses de outubro e decembro deste ano 2019), e até o 5 de xullo está aberto o prazo para presentar as propostas.
Quen precise máis información sobre as bases da convocatoria para as estadías de autores en diferentes linguas, pode recadar máis información a través do documento específico habilitado en PDF, o blogue de Axóuxere ou a conta de correo residencia@axouxerestream.com, ou ben chamar aos teléfonos 634 532 896 / 650 843 761 / 981 860 371.
A iniciativa de Axóuxere, unha proposta activa anual para fornecer “as condicións favorábeis para intensificar o proceso de creación literaria e o pensamento en contextos de traballo e aprendizaxe comunitarios”, contempla este ano a realización de cinco permanencias (cinco persoas) que se artellarán en dúas tempadas: a tempada estival (de agosto a setembro) e a tempada de outono (de outubro a decembro).
Para o seu desenvolvemento, as persoas elixidas residirán durante o tempo aproximado dun mes de estadía na casa, “en estreita relación coa comunidade das persoas que viven na aldea rianxeira de Brión”. A permanencia será de balde e cada beneficiaria ou beneficiario disporá dun cuarto individual con área de traballo de seu e con conexión a Internet.
A persoa residente comprométese a facer no Concello de Rianxo un seminario ou obradoiro de matrícula aberta e gratuíta, que terá unha duración mínima de 3 días. Igualmente, ofrecerá tamén unha conferencia, recital, conversa ou lectura pública no Concello de Rianxo ou noutros concellos da provincia da Coruña.
O programa está dirixido a “persoas de calquera nacionalidade que desenvolvan o seu traballo escriturario en calquera lingua e dentro de calquera xénero”.
