O actual alcalde de Ribeira e o seu equipo queren seguir a liña de xestión das anteriores lexislaturas, “onde se conseguiu un Concello con menos débeda e máis marxe para investir”, explica o rexedor, engadindo que “Ribeira é hoxe a segunda cidade de Galicia con menos paro”. O grupo local do PP aposta nestes comicios pola representatividade (están presentes todas as parroquias e todos os ámbitos sociais), pola presenza feminina (hai 11 mulleres e 10 homes) e pola renovación.
Ruiz Rivas, nado en Ribeira en 1957, é avogado e xestor de actividades deportivas, e foi concelleiro da súa cidade entre 1987 e 1997 e deputado do Parlamento de Galicia dende 1993. Esta, de conseguila, sería a súa terceira lexislatura local.
Na cabeza do seu equipo para as eleccións locais (renovado nun 66%) están María José Sampedro Fernández, Ana Isabel Ruiz Reiriz, Ramón José Doval Sampedro, Emilio Pérez Outeiral, Ana Isabel Barreiro Rego, Víctor Reiriz Lampón, Juana María Brión Santamaría, Elvira Pereira Ageitos, Javier Ventura Sampedro e María Dolores Sampedro Tato.
