A CIG convoca 16 manifestacións nos diferentes municipios galegos para conmemorar o Primeiro de Maio.
A CIG convoca este 1 de maio manifestacións nos diferentes municipios galegos, na maioría entre as 11 e as 12 da mañá. As principais razóns das mobilizacións son a esixencia dun traballo digno, o “non á guerra” e a loita contra o imperialismo e pola
soberanía dos pobos. Os municipios convocados as 12h. son: Vigo na Dobrada, Cee na Praza de Otero Lastres, A Coruña na Praza de Vigo, Vilagarcía na Casa do Mar, A Estrada na Praza do Mercado, Ferrol no Local Sindical, As Pontes na Praza do Carme, Santiago de Compostela na Praza Roxa, Ribeira na Praza do Peixe, Lugo no Edificio Sindical, Verín na Praza do Concello e O barco de Valdeorras na Praza do Concello. Comezarán media hora antes en Pontevedra na Praza da Ferrería e en Ourense na Praza Maior. Cangas será o único municipio no que a manifestación comezará ás seis da tarde na Praza do Concello.
Paulo Simón Carril Vázquez, secretario xeral da CIG, denunciaba nunha rolda de prensa o aumento da precariedade laboral e da poboación en risco de exclusión, advertindo que o contrato que máis leva medrando dende o 2021 é o do tipo fixo discontinuo, apuntando ademáis que o 75,5% das persoas con contratos parciais son mulleres. Tamén quixo remarcar a “crueldade” de Occidente ao apoiar o “xenocidio do pobo palestino”, outra das protestas pola que se covoca a manifestación.
Outro dos datos que máis preocupan é o do paro xuvenil, a taxa subiu en Galicia tres puntos no primeiro trimestre, en comparación co mesmo período de 2023, ata situarse no 22,3%, cuns 35.500 mozos de entre 16 e 29 anos sen emprego. Así informaba un Estudo
publicado polo Instituto Galego de Estatística (IGE), recollido por Europa Press, que indica que do total de 329.900 mozos que hai en Galicia, 159.200 son poboación activa (que teñen ou buscan emprego). Do conxunto de mozos sen emprego, uns 10.000 buscan
o seu primeiro traballo, mentres que 25.500 xa tiveron un contrato previamente. (Antía Pereira Rodríguez).
