O domingo 19 de maio celebrouse na Casa da Cultura de Outes o I Encontro de Zanfonas (Roda e Ludra). Contouse coa presenza da Asociación Cultural A Fuliada (Betanzos), a Aula de Música Tradicional do Campus de Pontevedra, a Escola de Instrumentos Populares Galegos Suso Vaamonde (Caldas de Reis), a Escola de Música Gaia (Pontevedra), a agrupación Tequexetéldere (A Estrada), a Escola de Música do Concello de Outes e a agrupación folclórica Hai Que Roelo (Cuntis).
Todas estas agrupacións achegáronse a Outes para compartir a súa música ao vivo a través “dun instrumento singular e único”, en palabras da organización do evento, que lembrou que a zanfona é un instrumento de corda, fundamental na nosa música popular, estreitamente vencellado aos cegos que o usaban para cantar e contar historias.
Hoxe o instrumento goza de boa saúde e o Concello de Outes imparte clases de zanfona no seo da súa Escola Municipal de Música e Baile Tradicional.
