A Mancomunidade Barbanza Arousa presentou este xoves 25 de xaneiro, no marco de FITUR 2024, un novo audiovisual que fai un percorrido pola historia da salgadura e a conserva industrial narrada polos seus protagonistas.
Na pasada edición deste evento turístico presentábase ao público unha produción audiovisual que destacaba “A emoción de descubrir”, poñendo de relevo todas as experiencias que poden ser vividas en Barbanza Arousa.
Este ano, buscouse transmitir ao público unha historia que ten como obxectivo concienciar e sensibilizar sobre a pegada deixada pola conserva e as fábricas de salgadura a través do seu patrimonio material e inmaterial no territorio, unindo isto á gran riqueza
enogastronómica que o caracteriza.
A proposta deste ano é un extracto das documental “Voces da Conserva”, que ten como fío condutor a historia persoal de Encarnación, unha muller que como tantas outras neste territorio dedicou a súa vida ao traballo no sector da conserva e a batea. A través dela faise un percorrido polas diferentes etapas que se foron sucedendo ao longo dos anos nesta industria que forma parte da idiosincrasia de Barbanza Arousa, desde os pioneiros ata a chegada da modernidade.
A produción desta peza audiovisual vén dar apoio ás diferentes accións que se están desenvolvendo no territorio a través do Plan de Sustentabilidade Turística dotado cun financiamento de 1.5 millóns de euros dos fondos Next Generation e que dotará ao destino de novas infraestruturas como o Museo da Conserva (Boiro), Museo da Salgadura (Ribeira), posta en valor do barrio dos cataláns (A Pobra do Caramiñal) ou aulas enogastronómicas (Rianxo).
Así mesmo, esta nova edición de FITUR serviu para centrar a promoción e comercialización do destino na súa riqueza enogastronómica que se concreta como un dos eixos centrais dos seus atractivos.
A presentación iniciouse da man da xerente da Mancomunidade, Fátima Cachafeiro, que fixo fincapé nas inmensas posibilidades que ofrece o territorio ao longo dos 365 días do ano e que se verán incrementadas con estas novas infraestruturas que se realizarán no territorio. A continuación, proxectouse esta peza audiovisual que trasladou a emoción e sensibilidade ao público asistente.
O acto continuou coa intervención de Cesáreao Pardal, presidente do Clúster de Turismo de Galicia, que sinalou “o importantes que son estes proxectos para o territorio” indicando que se xerará “un turismo de calidade ao longo de todo o ano”. A continuación,
seguiu a intervención de D. #Luis Pérez Barral, presidente da Mancomunidade, que destacou a riqueza do produto fresco de Barbanza Arousa así como dos seus viños da IGP Terras do Barbanza e Iria. A continuación, realizou a súa intervención D.
Xosé Regueira, vicepresidente da Deputación da Coruña e deputado de turismo, que destacou os proxectos de Barbanza Arousa como “produtos turísticos de primeira importancia para Galicia”, sinalando a súa excelencia grazas á “diversificación e utenticidade”. Pechou o acto a intervención Carmen Pita, directora de promoción da Axencia de Turismo de Galicia, que coas súas palabras quixo remarcar o traballo da mancomunidade Barbanza Arousa na dirección do turismo sostible e cheo de propostas, sendo “unha oportunidade única visitar este territorio” e “un claro exemplo de todo o que Galicia pode ofrecer”.
A participación da Mancomunidade Barbanza Arousa en FITUR 2024 continuou cunha importante axenda de reunións con operadores turísticos, seguindo coa estratexia xa iniciada en edicións anteriores. Así mesmo, este foro que reúne a profesionais do sector turístico de todo o mundo, permitiu o contacto con empresas tecnolóxicas punteiras do sector para coñecer de primeira man os avances en dixitalización turística que son de gran interese para a entidade, debido a que no territorio están a executarse fondos Next Generation para Destinos Turísticos Intelixentes.
